‘बोक्सीको घर’ ५१ दिनमा
सुशासन नेपाल
काठमाडौं । केकी अधिकारीले निर्माण गरेको फिल्म ‘बोक्सीको घर’ले शनिबार प्रदर्शनको ५१ औं दिन मनाएको छ । न्युरोडस्थित रञ्जना सिनेप्लेक्स हलमा फिल्मले प्रदर्शनको उक्त उपलब्धि हासिल गरेको हो ।
चलचित्र विकास बोर्डको बक्स अफिस डेटाअनुसार फिल्मको कमाइ १० करोडभन्दा माथि छ । बोर्डको बक्स अफिस तथ्यांकअनुसार ‘बोक्सीको घर’ २०८१ सालमा प्रदर्शनमा आएका फिल्ममध्ये सर्वाधिक कमाउने घरेलु फिल्म समेत बनेको छ ।
अन्य मुख्य मल्टिप्लेक्सबाट फिल्म हट्दा रञ्जना हलमा भने यसले निरन्तरता पाइरहेको छ । अभिनेत्री समेत रहेकी केकीको होम प्रोडक्सनबाट बनेको यो पहिलो फिल्म समेत हो ।
आफ्नो फिल्म व्यावसायिक रुपमा सफल भएकोमा उनले दर्शकप्रति आभार व्यक्त गरेकी छन् । यतिबेला सुलक्षण भारती निर्देशित फिल्म विदेशमा समेत चलिरहेको छ । केकी आफैं फिल्म लिएर विदेश दौडाहामा छिन् ।
हालै उनले युरोप र मध्यपूर्वको यूएईमा पनि फिल्मको स्क्रिनिङ गरिन् । अस्ट्रेलिया र अमेरिकामा पनि फिल्म प्रदर्शन भइसकेको छ । उनले विदेशबाट समेत सकारात्मक प्रतिक्रिया आइरहेको बताएकी छन् ।
