कांग्रेस बदल्न कांग्रेसभित्रै बसेर संघर्ष बाहेकको विकल्प छैन : महामन्त्री गगन थापा
सुशासन नेपाल
तनहुँ । नेपाली कांग्रेसका महामन्त्री गगन थापाले कांग्रेस बदल्न कांग्रेसभित्रै बसेर संघर्ष गर्नुपर्ने बताएका छन् । उनले हालै कांग्रेस छाडेर राष्ट्रिय स्वतन्त्र पार्टी प्रवेश गरेर तनहुँ १ मा उम्मेदवार बनेका स्वर्णिम वाग्लेलाई कांग्रेसलाई लात हानेर, कांग्रेसको झ्यालमा ढुंगा हानेर कांग्रेस बदलिन्छ भनेर प्रश्न गरेका छन् ।
तनहुँ १ मा उपनिर्वाचनमा कांग्रेसका गोविन्द भट्टराईले उम्मेदवारी दर्ता गरेपछि आयोजित कार्यक्रममा उनले कांग्रेसभित्र बदल्नुपर्ने कुरा यहीँ बसेर बदल्ने बताए । ‘नेपाली कांग्रेसभित्र जे भइरहेको छ ठीक भइरहेको छैन, नेपाली कांग्रेसभित्र धेरै कुरा बदल्नुपर्नेछ’ उनले प्रश्न गरे, ‘तर कांग्रेसलाई लात हानेर बाहिरबाट कांग्रेस खराब भनेर ढुंगा हानेर, झ्याल फुटाएर कांग्रेस बदलिन्छ ? कांग्रेस बदल्न त्यहीँभित्र बसेर लड्नुपर्छ, संघर्ष गर्नुपर्छ ।’
महामन्त्री थापाले अगाडि भने, ‘घुम्दै घुम्दै आएका टुरिस्ट उम्मेदवारलाई यहाँका जनताले भन्नुपर्छ कांग्रेस जो आयो त्यसले बजाउने चोकमा राखेको मादल होइन ।’
