बागमतीका मुख्यमन्त्री जम्कट्टेलले पाए विश्वासको मत
हेटौडा । बागमती प्रदेशका मुख्यमन्त्री शालिकराम जम्कट्टेलले मंगलबार प्रदेश सभाबाट विश्वासको मत प्राप्त गरेका छन् । उनलाई प्रदेश सभाका एक सय पाँच सांसदले विश्वासको मत दिएका हुन् ।
मुख्यमन्त्री जम्कट्टेल सरकारबाहिर रहेको कांग्रेससहित अन्य ६ दलको विश्वास जुटाउन सफल भएका छन् । एक सय १० सदस्यीय प्रदेश सभामा मुख्यमन्त्री हुन ५६ सांसदको समर्थन आवश्यक पर्छ ।
मंगलबारको बैठकमा प्रदेश सभाका एक सय नाै सदस्य उपस्थित थिए । प्रदेश सभाका सभामुख र उपसभामुखले विश्वासको मतसम्बन्धी प्रस्तावमा भाग नलिँदा एक सांसद अनुपस्थित थिए ।
मंगलबारको बैठकमा प्रदेश सभाका सभामुख भुवन पाठकले मुख्यमन्त्रीको विश्वासको प्रस्तावको पक्षमा एक सय पाँच र विपक्षमा तीन मत खसेको सदनलाई जानकारी गराएका थिए । प्रदेश सभामा तीन सांसद रहेको नेपाल मजदुर किसान पार्टीले विपक्षमा मतदान गरेको थियो । बागमती प्रदेश सभामा नेमकिपा मात्र प्रतिपक्षी दलको रूपमा रहेको छ ।
प्रदेश सभामा कांग्रेसका ३७, एमालेका २७, माओवादी केन्द्रका २१, राप्रपाका १३, एकीकृत समाजवादीका सात, नेमकिपाका तीन र हाम्रो नेपाली पार्टीका दुई सांसद रहेका छन् । प्रदेश सभाको बैठक अर्को सूचना नभएसम्मका लागि स्थगित भएको छ ।