राजनीतिमा छट्टु मान्छेहरू हाबी हुन थाले : महामन्त्री थापा
काठमाडौँ । कांग्रेसका महामन्त्री गगनकुमार थापाले नेपाली राजनीतिमा धैर्यता भएका र गतिवानभन्दा पनि छट्टु मान्छेहरू हाबी हुन थालेको बताएका छन् । काठमाडौंमा मंगलबार आयोजित ‘नेपालको लोकतान्त्रिक आन्दोलन र नविन्द्रराज जोशी’ विषयक अन्तरक्रिया कार्यक्रममा महामन्त्री थापाले राजनीतिमा गतिशील र गम्भीर व्यक्तिहरू आउनुपर्ने बताएका हुन् ।
‘राजनीतिमा छट्टुहरू हाबी हुन थाले । छट्टुहरू त आउँछ, लटरपटर पार्छ, झुक्याउँछ । अलपत्र यसो रङरोगन गर्छ, जान्छ,’ उनले भने, ‘हामीलाई छट्टुहरू चाहिएको होइन । हामीलाई धैर्यता भएको, धैर्यताको अर्थ केही पनि नगर्ने मान्छे पनि होइन, हामीलाई गति भएको मान्छे पनि चाहियो । गति र मती दुवै भएको मान्छे चाहियो । मती छ गति छैन, गति छ, मति छैन । हामीलाई त गति र मति दुईवटै चाहियो । किनकि यो बेलामा हामीले मति पनि ठीक राख्नुपर्नेछ ।’
थापाले राजनीति सफा राख्न पार्टीभित्रका नकारात्मक कुराहरू पनि हटाउनुपर्ने बताए । उनले भने, ‘हामीले आफ्नो घरभित्रको फोहोर पनि ठीक गर्नुपर्नेछ । हाम्रो घरभित्र फोहोर छ, सफा गर्नुपर्नेछ । हाम्रो कतिपय ठाउँमा मति बिग्रेको छ । त्यसलाई ठीक गर्नैपर्छ ।’
भिडियोमा हेर्नुहोस् ।