प्रधानमन्त्री प्रचण्ड एमाले सचिव लेखराज भट्टको घरमा किन गए ?
सुशासन नेपाल
धनगढी । प्रधानमन्त्री पुष्पकमल दाहाल प्रचण्ड आज सुदूरपश्चिम गएका छन्। आइतबार बिहान बुद्ध एयरको नियमित उडानमार्फत् प्रधानमन्त्री प्रचण्ड धनगढी पुगेका थिए। लगत्तै प्रधानमन्त्री दाहाल गोदावरी नगरपालिका वडा नम्बर १ अत्तरियामा रहेको नेकपा एमालेका सचिव लेखराज भट्टको घर पनि पुगेका छन्।
प्रधानमन्त्री दाहालले एमाले सचिव भट्टसँग राजनीतिक घटनाक्रमलगायतका विषयमा पनि कुराकानी गरेका छन्।‘यो घरसँग मेरो ४० वर्षदेखिको सम्बन्ध छ। यो घरको माथि एउटा कोठा छ, त्यहाँ म बस्थेँ,’ भट्टसँग भेटघाट गरेपछि पत्रकारहरूसँग संक्षिप्त कुराकानी गर्दै प्रधानमन्त्री दाहालले भने, ‘त्यसैले यो घर मेरो पनि हो भन्ने लागेर म आज यहाँ आएको हुँ। बाँकी कुरा लेखराजजी राजनीतिक व्यक्तित्व भएकोले समसामयिक राजनीतिक घटनाक्रमबारे छलफल हुने नै भइहाल्यो।’
भट्ट पहिले माओवादीमै थिए। नेकपाको एकीकरणबारे सर्वोच्च अदालतको आदेशपछि उनी एमालेमा लागेका हुन्। भट्टले पनि प्रधानमन्त्री प्रचण्डलाई घरमा स्वागत गरेको बताए। आफूले घरमा प्रधानमन्त्री दाहाललाई स्वागत गरेको र चिया खाएर प्रधानमन्त्री दाहाल गएको उनको भनाइ थियो।
यो भेटघाट तपाईंलाई माओवादीमै फर्काउने रणनीति हो? भन्ने पत्रकारको प्रश्नमा जवाफ दिँदै एमाले सचिव भट्टले भने, ‘यो त अलग विषय हो, त्यो विषयमा हामीबीच अहिले कुनै छलफल नै भएन। त्यो अहिले सम्भावना पनि छैन।’ प्रधानमन्त्री दाहाल सुदूरपश्चिम विश्वविद्यालयमा हुने दीक्षान्त समारोहमा सहभागी हुन धनगढी गएका हुन्।
