चितवन–२ मा यी हुन् मनोनयन दर्ता गराएका उमेदवार
सुशासन नेपाल
चितवन । उपनिर्वाचनका लागि चितवन–२ मा रवि लामिछानेले मनोनयन दर्ता गराएका छन् । राष्ट्रिय स्वतन्त्र पार्टीका सभापति लामिछाने गत मंसिर ४ मा भएको प्रतिनिधिसभा सदस्यको चुनावमा यहीँबाट निर्वाचित भएका थिए । नागरिकता विवादमा अदालतले उनको सांसद पद खारेज गरेपछि चितवन–२ मा वैशाख १० मा उपनिर्वाचन हुन लागेको छ ।
त्यस्तै, गठबन्धनको तर्फबाट जितनारायण श्रेष्ठ र नेकपा एमालेबाट रामप्रसाद न्यौपानेले मनोनयन दर्ता गराएका छन्। महामन्त्री विश्वप्रकाश शर्मासँगै निर्वाचन अधिकृतको कार्यालय पुगेका श्रेष्ठ र एमाले नेता गोकुल बाँस्कोटासँगै गएका न्यौपानेले मनोनयन गर्दा गराएका हुन्। उम्मेदवारी दर्तापछि उनीहरूले एक–अर्कामा जितको शुभकामना दिँदै अंकमाल गरेका छन्।
चितवन–२ मा पहाडी क्षेत्र इच्छाकामना गाउँपालिका र कालिका नगरपालिकासहित भरतपुर महानगरपालिकाका २९ मध्ये सदरमुकाम र नारायणगढ बजार क्षेत्र र यस आसपासका १० वटा वडाहरू रहेका छन् ।
चितवन जिल्ला निर्वाचन कार्यालयका प्रमुख भीमसेन कार्कीका अनुसार चितवन–२ मा यो पटक एक लाख २४ हजार ६९५ मतदाता कायम भएका छन् । मंसिरमाभन्दा ४८० मतदाता थपिएका छन् । मतदानका लागि ४३ मतदान स्थलमा १३८ मतदान केन्द्र रहने छन् ।
