आज होली पर्व उल्लासपूर्वक मनाइँदै
सुशासन नेपाल
काठमाडौँ – रङहरूको उत्सव होली पर्व आज (बिहीबार) पहाडमा उल्लासपूर्वक मनाइँदै छ । पहाडमा मनाइएको भोलिपल्ट तराईमा होली मनाउने चलन छ । एक अर्कामा अबीर दलेर होली पर्व मनाइन्छ ।
सरकारले तराई र पहाडमा फरक फरक दिनमा होलीको बिदा दिने गरेको छ । यो वर्ष होलीका अवसरमा बिहीबार पहाडमा सरकारले सार्जनिक बिदा दिएको छ । रङहरुमा रमाएर हर्षोल्लासपूर्वक होली मनाउन आह्वान गर्दै बिहीबार फागुपूर्णिमाको अवसरमा राष्ट्रपति, उपराष्ट्रपति, प्रधानमन्त्री लगायत देशका उच्च पदस्थ व्यक्तिहरुले शुभकामना दिएका छन् ।
होलीको अवसरमा राष्ट्रपति रामचन्द्र पौडेलले नेपालीहरूको साझा पर्व फागुपूर्णिमा (होली) पर्वले सामाजिक सद्भाव र राष्ट्रिय एकतालाई थप सुदृढ बनाउन योगदान पुर्याउने विश्वास व्यक्त गरेका छन् । समाजमा विद्यमान विभिन्न प्रकारका विकृति, विसङ्गति एवम् कुरीतिलाई निर्मूल गर्दै मौलिक संस्कृतिको संरक्षण र संवर्द्धन गर्न प्रेरणा प्रदान गरोस् भनी उनले शुभकामना दिएका छन् ।
त्यस्तै, उपराष्ट्रपति रामसहायप्रसाद यादवले सामाजिक, सांस्कृतिक र राष्ट्रिय महत्व बोकेको फागुपूर्णिमा (होली) पर्वले सांस्कृतिक वैभव र धरोहरलाई समृद्ध बनाउन सघाउ पुर्याउने विश्वास व्यक्त गरेका छन्। उनले यस पर्वले देश र समाजमा एकता तथा शान्ति कायम गर्न महत्वपूर्ण भूमिका निर्वाह गर्ने समेत बताएका छन्।
प्रधानमन्त्री केपी शर्मा ओलीले पनि हर्ष र उमंगका साथ होली पर्व मनाउन भन्दै शुभकामना सन्देश दिएका छन्। सभामुख देवराज घिमिरेसहित उच्च पदस्थ व्यक्तिहरूले समेत होलीमा शुभकामना सन्देश दिएका छन्। यही पर्वलाई लक्षित गर्दै देशभरि प्रशासनले शान्तिपूर्ण र मर्यादित भएर होली खेल्न आग्रह गरेको छ ।
