भारतमा लोकसभा चुनावको घोषणा
सुशासन नेपाल
नयाँ दिल्ली । भारतमा १९ अप्रिल (वैशाख ७) बाट सात चरणमा लोकसभा चुनाव हुने भएको छ । लोकसभाले ५ वर्षे कार्यकाल मे महिनामा पूरा गर्दैछ ।
भारतको निर्वाचन आयोगले शनिबार पत्रकार सम्मेलनमार्फत चुनावको मिति घोषणा गरेको हो । कार्यतालिकाअनुसार पहिलो चरणको मतदान १९ अप्रिलमा हुनेछ । त्यसपछि दोस्रो चरण २६ अप्रिलमा हुने छ । तेस्रो चरण ७ मेमा, चौथो चरण १३ मे, पाँचौ चरण २९ मे र छैठौं चरणको मतदान २५ मेका दिन हुनेछ ।
त्यस्तै, अन्तिम सातौं चरणको मतदान जुन–१ का दिने हुनेछ । अप्रिल १९ बाट सुरु भएर जुन १ मा मतदानको कार्य सकिने मुख्य निर्वाचन आयुक्त राजीव कुमारले पत्रकार सम्मेलनमा जानकारी दिएका छन् । सबैतिरको मतगणना एकैसाथ ४ जुनबाट प्रारम्भ हुनेछ । सात चरणको मतदान डेढ महिनामा पूरा हुनेछ ।
लोकसभाको ५ सय ४३ सिटका लागि मतदान हुनेछ । पहिलो चरणमा १ सय २, दोस्रोमा ८९, तेस्रोमा ९४, चौथोमा ९६, पा“चौंमा ४९, छैठौंमा ५७ र सातौं चरणमा ५७ सिटका लागि मतदान हुने आयोगले जनाएको छ ।
लोकसभा चुनावसँगै आन्ध्र प्रदेश, उडिशा, अरुणाचल प्रदेश र सिक्किममा विधानसभा चुनाव पनि हुँदैछ । त्यस्तै, देशभरका विधानसभामा रिक्त रहेका २६ सिटमा उपनिर्वाचन पनि यही अवधिमा गराइने मुख्य आयुक्त राजीव कुमारले जानकारी दिए । उनले भारतको चुनाव विश्वकै सबैभन्दा ठूलो लोकतान्त्रिक पर्वमा रुपमा हेरिने गरेको बताएका छन् ।
उनले हरेक मतदातालाई मतदान दिन सहजता हुने गरी मतदान केन्द्र र आवश्यक सहजीकरणको व्यवस्था गरिएको बताए । ८५ वर्ष उमेरमाथि र ४० प्रतिशत शारीरिक अशक्त जो घरबाटै मतदान गर्न चाहन्छन् उनलाई त्यस अनुसारको सुविधा प्रदान गरिने मुख्य निर्वाचन आयुक्त कुमारले बताएका छन् ।
आगामी लोकसभा चुनावका लागि भारतमा ९६ करोड ८८ लाख २१ हजार ९ सय २६ मतदाता छन् । त्यसमध्ये ४९ करोड ७ लाख पुरुष र ४७ करोड १ लाख महिला मतदाता छन् । अघिल्लो चुनावभन्दा यसवर्ष १ करोड ८४ लाख ८१ हजार ६ १० जना नयाँ मतदाता थपिएका छन् । ती मतदाताका लागि देशभर साढे १० लाख पोलिंग स्टेशन राखिने जनाइएको छ । मतदानका लागि ५५ लाख एलेक्ट्रोनिक भोटिङ मेशिनको प्रयोग हुनेछ ।
